2025/12/19ko prentsa-oharra

ADMINISTRAZIO PUBLIKOEN DIREKTORIOA. 2025/01/01

Administrazio Publikoek 163.196 pertsona zituzten enplegatuta 2025eko urtarrilaren 1ean, aurreko urtean baino % 0,2 gutxiago

Euskal administrazioetako funtzionarioen kopuruak % 7,9ko igoera izan du, eta bertako langile guztien % 69,8 dira

Eustaten datuen arabera, 2025eko urtarrilaren 1ean Euskal Autonomia Erkidegoko Administrazio Publikoek 163.196 pertsona zituzten enplegatuta, hau da, aurreko urtean baino % 0,2 gutxiago. Datu horrek Euskal AEn Estatuko Administrazioaren mende diharduten langileei buruzko informazioa biltzen du lehen aldiz.

Enplegu publikoan diharduten emakumeen eta gizonen arteko proportzioak ez du aldaketarik izan 2024tik; % 62 (101.161) emakumeak dira, eta % 38 (62.035) gizonak. 2020-2025 aldia aztertuz gero, euskal administrazioetan diharduten emakumeen kopuruak % 8,5eko igoera izan du, eta Estatuaren mendeko erakundeetan diharduten emakumeen kopurua, berriz, % 1 jaitsi da.

Feminizazio-tasa % 50etik gorakoa da administrazio-esparru guztietan, eta bereziki nabarmentzen da euskal administrazioetan (% 64,2). Administrazio Zentralaren mendeko erakundeetan, berriz, tasa hori askoz txikiagoa da (% 38,8koa). Emakumeen tasarik handiena Eusko Jaurlaritzak du (% 70,2), eta, ondoren, foru-aldundiek (% 60,2). Toki-erakundeetan, sexuen arteko egitura oso orekatuta dago; % 50,3 emakumeak dira, eta % 49,7 gizonak.

Langileen egitura, esparru arautzailearen arabera

2025. urtearen hasieran, funtzionarioak Euskal AEko langile guztien % 68,3 ziren, hots, aurreko urtean baino portzentajezko 4,6 puntu gehiago, urte arteko % 7,1eko igoeraren ondorioz. Bestalde, langile lan-kontratudunak % 30,8 ziren, bi kasuetan Osakidetzako estatutupeko langileak barnean hartuta. Gainerako % 0,9 goi-kargudunak ziren.

Lan-egonkortasunari dagokionez, langile publikoen % 63,8 finkoak dira, funtzionario, lan-kontratudun eta estatutupeko langile finkoak batuta. Proportzio hori % 61,1ekoa da euskal administrazioetan, eta % 91,5era iristen da Administrazio Zentralaren mendeko administrazioetan.

Bitarteko funtzionarioak guztien % 19,9 dira, hots, aurreko urtean baino % 6,6 gehiago. Nolanahi ere, euskal administrazioetan izandako igoera nabarmentzen da (% 7koa), batez ere Eusko Jaurlaritzan eta haren mendeko erakundeetan (% 17,8koa). Toki-erakundeetan, haien mendeko erakundeetan eta beste euskal erakunde batzuetan ere gora egin du langile horien kopuruak (% 4,7), eta foru-aldundietan eta haien erakundeetan, berriz, % 8,7ko beherakada izan du. Estatuko Administrazioan, beherakada are handiagoa izan da (% 35,5ekoa).

Aldi baterako langile lan-kontratudunen ehunekoak behera egiten jarraitu du, eta portzentajezko bost puntuko jaitsiera izan du. Aurreko urtearekin alderatuta, % 25,2 gutxiago dira. Beherakadarik handiena Eusko Jaurlaritzan eta haren mendeko erakundeetan gertatu da (-% 35,7), eta, ondoren, toki-erakundeetan eta haien mendekoetan (-% 12,1) eta gainerako beste euskal erakundeetan (-% 1,6). Foru-aldundietan eta haien mendeko erakundeetan, berriz, % 1eko igoera gertatu da, eta Estatuko erakunde publikoek % 22,5eko jaitsiera izan dute.

Oro har, bitarteko funtzionarioak eta aldi baterako langile lan-kontratudunak, batuta, guztien % 35,3 dira, hots, % 10,1 gutxiago.

Langileen banaketa, administrazio motaren arabera

2025eko urtarrilaren 1ean, langile publiko guztien % 91,2k euskal administrazioetan ziharduten, eta % 8,8k Administrazio Zentralaren mendeko erakundeetan. Euskal administrazioen barruan, gehienek Euskal AEko Administrazio Orokorrean ziharduten (% 59,2k), eta, ondoren, toki-erakundeetan (% 17,4k), foru-aldundietan (% 7,9k) eta unibertsitatean, fundazioetan eta beste euskal erakunde publiko batzuetan (% 6,7k).

Urteko hazkundeari dagokionez, toki-erakundeek eta haien mendeko erakundeek izan dute igoerarik handiena langileen kopuruan (% 2,1ekoa), eta, haien atzetik, foru-aldundiak eta haien mendeko erakundeak (% 1,7ko igoerarekin) eta beste euskal erakunde publiko batzuk (% 0,5eko igoerarekin) kokatu dira. Aitzitik, Eusko Jaurlaritzan eta haren erakundeetan % 1,2ko beherakada gertatu da, eta Estatuko Administrazioan, berriz, % 0,1ekoa.

Urteko batez besteko langileei dagokienez, administrazio publiko guztiak kontuan hartuta, langile publikoen kopuruak 9.437 pertsonako igoera izan du 2019. urteaz geroztik, eta urteko batez besteko tasa metatua % 1ekoa izan da. Nolanahi ere, euskal administrazioetan izandako igoera nabarmentzen da (10.780 langile gehiago). Estatuko erakundeetan, berriz, 1.343 langile gutxiago dira, eta batez besteko tasa metatua -% 1,5era iritsi da. Hazkunde absoluturik handiena Eusko Jaurlaritzak eta haren mendeko erakundeek izan dute (+7.616), % 1,4ko batez besteko aldakuntza metatuarekin. Haien atzetik, honako hauek kokatu dira: toki-erakundeak (+1.641), % 1eko batez besteko aldakuntza-tasa metatuarekin; foru-aldundiak (+1.143), % 1,5eko tasarekin, eta unibertsitatea, fundazioak eta elkarte publikoak (+380), % 0,6ko batez besteko tasa metatuarekin.

Azken urtean, administrazio publikoetako langileen batez besteko kopurua % 0,7 igo da, eta igoerarik esanguratsuena toki-erakundeetan eta mendeko erakundeetan gertatu da (% 2,5ekoa).

Langileen banaketa, lurraldearen arabera

Administrazio publiko bakoitzak lurraldearen arabera duen ehunekoari dagokionez, Arabak du euskal administrazioen proportziorik handiena Estatuko Administrazioari atxikitako langileekin alderatuta (% 92,4 eta % 7,6, hurrenez hurren). Bizkaiko eta Gipuzkoako ehunekoak antzekoak dira. Izan ere, bietan langile publikoen % 90,8 Euskal Administraziokoak dira, eta % 9,2 Estatuko Administraziokoak.

Bestalde, Bizkaiko lurraldeak Administrazio Publikoko langile guztien % 49,1 bildu ditu, Gipuzkoak % 29,5 eta, azkenik, Arabak gainerako % 21,4.

Ohar metodologikoa:

Administrazio Publikoen Direktorioaren esparrua osatzen dutenak honako hauek dira: Euskal AEko Administrazio Orokorra, foru-aldundiak eta udalak, haien mendeko administrazioko erakunde autonomoekin batera, erakunde publikoak, sozietate publikoak, fundazioak, irabazi-asmorik gabeko erakundeak eta Estatuko Administrazioaren mendeko erakunde publikoak. Barnean hartzen dira % 50eko edo hortik gorako partaidetza publikoa duten erakunde guztiak, dela administrazio bakar baten partaidetza, dela hainbat administrazio publikoren baterako partaidetza.

Informazio gehiago:

Eustat - Euskal Estatistika Erakundea / Instituto Vasco de Estadística
Donostia kalea, 1 01010 Vitoria-Gasteiz
Prentsa Zerbitzua: servicioprensa@eustat.eus Tel.: 945 01 75 62