Euskal AEko txikizkako merkataritzaren sektorean, 2003ko hirugarren hiruhilekoan, salmentak %4,4 igo dira, kopuru nominaletan, aurreko ekitaldiko hiruhileko beraren aldean, Eustatek emandako datuen arabera. Hazkunde nominal hori, kopuru errealetan, %2,7ko garapen positiboa da.

Tradiziozko txikizkako merkataritzaren (espezializatua) salmenta nominalak %3,6 igo dira 2003ko hirugarren hiruhilekoan, 2002ko hirugarren hiruhilekoaren aldean. Igoera nominal hori, prezioen igoeraren eragina kenduta, %2,9koa da, balio errealetan.

Gune ertain eta handietako txikizkako salmentak (ez-espezializatua) %5,7 hazi dira balio nominaletan, aurtengo hirugarren hiruhilekoan. Prezioen igoeraren eragina kendu eta gero, urte arteko tasaren aldakuntza %2,2koa da, aurreko urteko hiruhileko beraren aldean.

Herrialde Historikoka banatuz gero, hirugarren hiruhileko honetan, Araban izan da txikizkako merkataritzako salmenta nominalen hazkunderik handiena; %6,0eko urte arteko hazkundea izan baita, txikizkako merkataritza espezializatuaren hazkunde handiak eraginda (%6,6). Atzetik Bizkaia du, indize orokorreko %4,4ko aldakuntza positiboarekin eta Gipuzkoak, %3,7ko hazkundea izan du. Balio errealetan, honako hazkundeak izan dira: %4,0koa Araban, %2,8koa Bizkaian, eta %1,9koa Gipuzkoan.

2003ko bigarren hiruhilekoan txikizkako merkataritzaren sektorean ziren landunen aldetik, urte arteko %1,8ko hazkundea izan zen (aurreko urteko hiruhileko beraren aldean) Euskal AEko guztizkorako. Iragan abendutik honera burututako enplegu hazkundea %1,5koa izan da eta Herrialdeka honakoak dira datuak: Gipuzkoan (%2,2), Araban (%1,4) eta Bizkaian, (%1,1).