2022/07/29ko prentsa-oharra

INFORMAZIOAREN ETA KOMUNIKAZIOAREN TEKNOLOGIEN (IKT) SEKTOREAREN ESTATISTIKA. 2020

IKT sektoreko enpresen % 70ek merkataritza elektronikoa erabili zuten Euskal AEn 2020an, sektoreen guztizkoaren % 26,9ren aldean

Berrikuntza, I+G eta merkataritza elektronikoa nabarmentzen dira IKTen sektorean, gainerako sektoreekin alderatuta

Euskal AEko Informazioaren eta Komunikazioaren Teknologien (IKT) sektoreko enpresak 2020an merkataritza elektronikoaren erabileran nabarmendu ziren, enpresen guztizkoaren datuekin alderatuz; eta % 70,1era iristen zen merkataritza elektronikoa erabiltzen zutenen ehunekoa, sektore guztiak hartuz % 26,9k erabiltzen zuen bitartean, Eustatek landutako datuen arabera.

Gainera, sektore horrek beste urte batez datu positiboak izan zituen 2019aren aldean, eta enpresen kopuruak (% 2) eta enpleguak (% 1) gora egin zuten. 2010etik —eskuragarri dagoen serie historikoaren lehen urtetik— IKTen sektorean sartutako enpresen kopurua % 32,1 hazi da, eta lanpostuena, berriz, % 9,0.

Zehazki, 2020an 2.763 enpresa eta 24.225 lanpostu zenbatu ziren sektore horretan, 2010az geroztik izan diren balio maximoak; enpresen batez besteko tamaina 8,8 pertsonakoa izanik.

Aitzitik, negozio zifra % 4,7 murriztu zen aurreko urtearen aldean, eta balio erantsia % 10,6.

2020an, IKTen sektoreak euskal ekonomiako lanpostuen % 2,4 eta enpresen % 1,8 biltzen zituen. Era berean, balio erantsi osoaren % 2,5 —1.629 milioi— izan zen, eta 4.068,5 milioi euroko negozio-zifrara iritsi zen.

IKT sektoreko enpresek sektore guztiak batera hartuta baino neurri handiagoan egiten dituzte I+G+Bko jarduerak

IKT sektoreak, Euskal AEko enpresa guztien % 1,9 bakarrik izan arren, I+G egiten dutenen % 13,8 biltzen ditu, eta 87,0 milioi eurorekin, enpresa-sektorearen barneko I+Gko gastu osoaren % 7,6 egikaritzen du. Gainera, IKT sektoreko enpresen % 7,3k barneko I+G jarduerak egiten ditu, eta portzentaje horrek nabarmen gainditzen du sektoreen guztirakoan erregistratu zena, % 1,0ekoa izan baitzen.

2020an, sektore horretan I+Gn 1.549 langile aritu ziren “dedikazio osoko baliokidetzan”; horietatik % 24,8 (385) emakumeak izan ziren. IKT sektorean zeuden I+Gko 1.549 pertsona horiek I+Gn diharduten enpresen sektoreko langileen % 11,2 ziren, eta, era berean, alderatzea I+Gko langile guztiekiko egiten badugu, % 7,9 ziren.

Berrikuntzari dagokionez, I+Gn gertatzen den bezala, alde nabarmenak daude sektoreen guztizkoaren eta IKTen guztizkoaren artean. Horrela, 2020an, IKT sektoreko establezimenduen % 35,2 berritzaileak izan ziren, sektore guztiak kontuan hartuta % 18,6 izan ziren bitartean. Enpresaren tamaina kontuan hartuz gero, “10 langile edo gehiago zituztenen artean” % 53,1eko ehunekoak lortu ziren, eta % 31,4 sektore guztiak kontuan hartuta.

Berrikuntza-jardueretan egindako gastuaren inguruan, IKT establezimenduek 223,6 milioi euro bideratu zituzten, sektore guztien gastuaren % 8,0. Gastu horretatik 161,3 milioi “10 langile edo gehiagoko" establezimenduei zegozkien, hau da, tamaina horretako enpresek gastatutako guztizkoaren % 6,8.

IKT sektoreak ere sektoreen guztizkoak baino baliabide-proportzio handiagoa bideratu zuen I+G+Bra, gastura bideratzen dituen zifrek adierazten duten bezala, bai berrikuntzan, bai barneko I+Gn negozio-zifrarekin alderatuta (intentsitate-ratioak berrikuntzan eta barneko I+Gn). Zehazki, berrikuntzaren intentsitatea 4,2koa da sektore horretan, sektore ekonomiko guztiak kontuan hartuta 1,8koa den bitartean. Barneko I+Gren kasuan, ratioa 2,2koa da IKTen sektorean, eta 0,9koa guztizkoan.

Merkataritza elektronikoa sektoreen guztizkoan baino hedatuago dago IKT sektorean

IKT teknologien erabilera oso hedatuta dago sektore honetako enpresetan, eta Internet eta posta elektronikoa % 100era iristen dira; sektoreen guztirakoan, berriz, enpresen % 90 baino pixka bat gehiagora Era berean, IKT sektorean web orriak dituzten enpresak % 75,3 dira eta sektoreen guztirakoan % 56,4.

Merkataritza elektronikoa ere gainerako sektoreetan baino dezente garatuago dago. IKT sektorean bitarteko horren bidez erosi zuten establezimenduak % 68,9 izan ziren eta salmentak egin zituztenak % 11,0, sektoreen guztizkoan % 24,0 eta % 7,6 izanik, hurrenez hurren. Horren ondorioz, merkataritza elektronikoa IKT establezimenduen % 70,1ean zegoen 2020an, eta sektoreen guztizkoan, berriz, % 26,9an.

Bestalde, IKT sektoreak ondasunen kanpo-merkataritzan duen eragina maila ez oso esanguratsuetan mantentzen da: esportazioak 338,9 milioi euro izan ziren —guztira 21.124,2 milioi—, eta inportazioak 515,8 milioi — inportazioak guztira 15.868,4 milioi—, hau da, % 1,6 eta % 3,3, hurrenez hurren.

Truke horietako produktu ohikoenen artean, esportazioetan, Beste IKT produktu batzuk (% 38,5) eta Osagai elektronikoak (% 38,1) nabarmentzen dira, eta inportazioetan, Telekomunikazio-ekipoak (% 33,8), Beste IKT produktu batzuk (% 30,1) eta Osagai elektronikoak (% 21,1).

Metodologiari buruzko oharra:

Informazioaren eta komunikazioaren teknologien garapenarekin, ekoizpenarekin, merkaturatzearekin eta erabilera intentsiboarekin lotutako jarduera nagusia duten manufaktura-industriek eta zerbitzu-industriek osatzen dute IKT sektorea, eta, ezaugarri gisa, berrikuntzan, aurrerapen teknologikoan eta produktibitatean tasa handiak ditu; beraz, eragin handia du jarduera ekonomikoan. Eustat Web-a. Fitxa metodologikoa: IKT sektorea

Argibide gehiago nahi izanez gero:

Eustat - Euskal Estatistika Erakundea / Instituto Vasco de Estadística Donostia-San Sebastián kalea 1, 01010 Vitoria-Gasteiz Prentsa-zerbitzua: servicioprensa@eustat.es Tel.: 945 01 75 62