2023/02/08ko prentsa-oharra
TXIKIZKAKO MERKATARITZAREN INDIZEA (BMIt). 2022/IV
Txikizkako sektorearen salmentek % 0,3ko igoera izan dute 2022ko laugarren hiruhilekoan Euskal AEn, gasolina-zerbitzugunerik gabe % 1,2ko beherakada izan badute ere
Urte osoan, salmentek % 2,9ko igoera izan dute
Eustatek landutako datuen arabera, Euskal AEko txikizkako merkataritzaren sektorearen salmentek % 0,3ko igoera izan dute 2022ko laugarren hiruhilekoan, aurreko urteko hiruhileko berarekin alderatuta, egutegiaren ondorioak atera ondoren eta prezio konstanteetan.
Salmenten guztizkoak, gasolina-zerbitzuguneak kontuan hartu gabe, % 1,2ko beherakada izan du 2022ko azken hiruhilekoan, aurreko urteko hiruhileko berarekin alderatuta.
Aurreko hiruhilekoarekin alderatuta, berriz, bidezko urtaro-ondorioak kenduta, 2022ko laugarren hiruhilekoko salmenta-indizeak % 0,1eko beherakada izan du.
Sektoreka, 2021eko laugarren hiruhilekoarekin alderatuta, Elikagaietan prezio konstanteetan egindako salmentek % 1,6ko beherakada izan dute urtetik urtera. Gainerako produktuen kasuan, salmentek % 0,8ko beherakada izan dute 2022ko laugarren hiruhilekoan, 2021eko azken hiruhilekoarekin alderatuta. Automoziorako erregaiaren sektorean, berriz, salmentak aurreko urteko azken hiruhilekoan baino % 22,4 handiagoak izan dira.
2022ko hirugarren hiruhilekoarekin alderatuta, urtaro-ondoriorik gabe eta prezio konstanteetan, Automoziorako erregaiaren eta Gainerako produktuen salmentek % 5,3ko eta % 0,9ko igoera izan dute, hurrenez hurren. Elikagaietan egindako salmentek, berriz, % 1,4ko beherakada izan dute hiruhilekotik hiruhilekora.
Euskal AEko Txikizkako Merkataritzaren Indizea. Urte arteko eta hilabete arteko aldakuntza-tasak (p). 2022/IV
| | Prezio finkoak |
| | t / t-4 | t / t-1 | At / At-4 |
| INDIZE OROKORRA lurralde historikoaren arabera | | | |
| Euskal AE | 0,3 | -0,1 | 2,9 |
| Araba/Álava | 0,6 | 0,9 | -0,1 |
| Bizkaia | 2,8 | 0,8 | 3,2 |
| Gipuzkoa | -3,6 | -1,8 | 3,7 |
| | | | |
| INDIZE OROKORRA sektorearen arabera | | | |
| Janariak | -1,6 | -1,4 | -0,4 |
| Elikagaien saltoki espezializatuak | -6,2 | -1,6 | -1,3 |
| Elikagaiak nagusi diren establezimendu ez-espezializatuak | 0,6 | 0,3 | 0,1 |
| Gainerako produktuak | -0,8 | 0,9 | 5,2 |
| Pertsonaren ekipamenduan espezializatutako establezimenduak | 6,5 | 2,0 | 10,1 |
| Etxearen ekipamenduan espezializatutako establezimenduak | -3,7 | -2,5 | 8,2 |
| Kontsumoko beste ondasunetan espezializatutako establezimenduak | -10,3 | -3,9 | -4,3 |
| Gainerako produktuak nagusi diren establezimendu ez-espezializatuak | -2,0 | 1,4 | -5,2 |
| Automoziorako erregaia | 22,4 | 5,3 | 7,1 |
| | | | |
| INDIZE OROKORRA gasolindegirik gabe | -1,2 | -0,2 | 2,6 |
| | | | |
| LANGILERIA-INDIZEA | | | |
| Euskal AE | 1,8 | 0,3 | 1,7 |
(p)Behinbehineko datuak
t / t-4 Urteen arteko aldakuntza. Egutegi eraginak zuzendutako datuak
t / t-1 Hiruhileko arteko aldakuntza. Datu desestazionalizatuak
At/A(t4) Lehen hiruhilekotik behatutako azkenekora arte metatutako aldiko urte arteko tasa (At) aurreko urtean metatutako aldi beraren aldean
Data 2023ko Otsailaren 8a
Iturria: Eustat. Txikizkako Merkataritzaren Indizea (BMIt)
Elikagaiei lotutako txikizkako merkataritzaren barruan, Elikagaietan, edarietan eta tabakoan espezializatutako merkataritzan (fruta-dendak, harategiak, arrandegiak eta abar) egindako salmentek % 6,2ko beherakada izan dute 2021eko laugarren hiruhilekoarekin alderatuta. Aitzitik, Elikagaiak, edariak eta tabakoa nagusi diren espezializatu gabeko txikizkako merkataritzan, salmentek % 0,6ko igoera izan dute.
Gainerako produktuen txikizkako merkataritzan, 2022ko laugarren hiruhilekoko salmentek aurreko urteko hiruhileko berarekin alderatuta izan duten bilakaera ez da homogeneoa izan. Beste kontsumo-ondasun batzuetan espezializatutako sektorean (kirol-gaiak, jokoak edo jostailuak, besteak beste), salmenten beherakada % 10,3ra iritsi da, Etxeko ekipamenduetan espezializatutakoan (etxetresna elektrikoak, altzariak eta telekomunikazio-ekipamenduak) % 3,7ra, eta Gainerako produktuak nagusi diren espezializatu gabekoan (korrespondentzia edo Internet), berriz, % 2,0ra. Pertsonen ekipamenduan espezializatutako merkataritzan (arropa, oinetakoak eta kosmetikako edo higieneko produktuak), aldiz, % 6,5eko igoera izan da urtetik urtera.
Lurralde historikoak kontuan hartuta, 2022ko laugarren hiruhilekoko salmenten indizeak % 2,8ko igoera izan du urtetik urtera Bizkaian, eta % 0,6koa Araban. Gipuzkoak, berriz, kontrako joera agertu du, eta salmentak aurreko urteko hiruhileko berean erregistratutakoak baino % 3,6 txikiagoak izan dira.
Aurreko hiruhilekoarekin alderatuta, salmenten bilakaera positiboa izan da Araban eta Bizkaian, eta % 0,9ko eta % 0,8ko igoerak izan dituzte, hurrenez hurren. Gipuzkoako salmentek, aldiz, % 1,8ko beherakada izan dute urteko hirugarren hiruhilekoarekin alderatuta.
Euskal AE osoan, 2022ko laugarren hiruhilekoan txikizkako merkataritzaren sektorean aritu diren langileen kopuruak % 1,8ko igoera izan du aurreko urteko laugarren hiruhilekoarekin alderatuta. 2022ko hirugarren hiruhilekoarekin alderatuta, berriz, enpleguak % 0,3ko igoera izan du.
2022. urteko balantzea
2022ko lau hiruhilekoetan metatutakoa kontuan hartuta, txikizkako merkataritzaren salmentek % 2,9ko igoera izan dute. Ildo horretan, Automoziorako erregaia eta Gainerako produktuak azpisektoreek ekarpen positiboak egin dituzte (% 7,1eko eta % 5,2ko igoera, hurrenez hurren). Elikagaien sektorean, berriz, 2022. urte osoan metatutako salmentak 2021ekoak baino % 0,4 txikiagoak izan dira.
Lurralde historikoak kontuan hartuta, 2022. urtean txikizkako merkataritzaren salmentek % 3,7ko igoera izan dute Gipuzkoan, eta % 3,2koa Bizkaian. Araban, berriz, % 0,1eko beherakada izan da.
INFORMAZIO-OHARRA
Eustatek eskerrak eman nahi dizkie informazioa biltzen lagundu duten establezimendu guztiei. Haiei esker, laugarren hiruhilekoko indizea laginaren % 94,1eko estaldurarekin kalkulatu da.
Informazio gehiagorako:
Eustat - Euskal Estatistika Erakundea / Instituto Vasco de Estadística
Donostia kalea, 1 01010 Vitoria-Gasteiz
Prentsa-zerbitzua: servicioprensa@eustat.eus Tel: 945 01 75 62